كمان مرة اجاني تلفون انه , عم صهرك توفى , و في اربد احمل حالك و تعال على الدفن , و فعلا كنت بإربد وقت الصلاة وطلعنا على المقبر ة و دفنا الرجال, و ارجعنا على الجمعية , و تغدينا منسف و دعيت لرجال من البي بعد النسف كان منصف صح يعني 7/10 و راجعت على عمان العصر
الشعور يلي بجيني كل ما اطلع على دفن حدا غريب جدا جدا , يعني مو يوم ما دفنت ستي الله يرحمها و كانت اول انسان متوفي بشوفه عن قرب او بلأحرى عن قرب اكتير , لهلا هداك اليوم ببال من وقت ما رن التلفون على 4.30 الفجر و حملنا حالنا انا ماما وانزلنا على الشام , و فتنا كان الوضع مكركب اكتير , وانا و ماما غسلنها و كفناها طبعا لأنه ستي كانت صحتها منيحة اكتير ف كان صعب انه يحركوها منيح , ف كان لازمهم مساعدة و طبع كفنتها انا و امي , و طلعنا على لمقبرة مقبرة الدحداح بدمشق و نزلت بالقبر و نزلتها لستي , و من هديك اللحظة اكتير شغلات اختلفت عندي , كانت خبرة فريدة من نوعها اذا بدي اكتب هداك اليوم بتفصيل رحيكون اكتير طويل لأنه لسا ببالي متل ما هوة كانو مبارح
كنت جوا القبر و مدخلو ضيق وعلى فكرة القبرو بلشام غير عن عمان المهم نزلنها و ركزتها و سكرنا القبر و مشي الحال ضلت 3 ايام و انا اعصابي باردة جدا , و ولاحتى دمعة بعيني , مع انه كانت الها معزة بقلبي خياليه و كانت تحبني اكتير و عنجد البي زعل عليها , بس ما كنت بموقف بسمح انه كون ضعيف في , اغلبهم نسوان و الكل فارط و ستي كانو محبينها اكتار ف ما كان الموضوع سهل وكان لازم يكون في حدا ماسك الوضع و راكز و صحيان مزبوط
طبعا بس ارجعت على عمان , دخلت غرفتي و بتزكر اني بكيت اكتير عليها ,
منبعدها بجد كل نظرتي للموت و الحكي هاد كلو صار مختلف , الميت يلي ناس بتخاف منو عبارة اعن انسان نايم , يعني اذا اله ميت كم ساعة لحد نهار بضل جسمه شوي طري و كانه شخص نايم بس ما عم بحس بالمرة , بس على يلي شفتهم يلي منيح و عامل خير بحياتو بكون ما بخوف هيك مألوف و هادي عادي , بس يلي عامل والعياذ بالله ميت قصة ابل ما يموت فعلا لما تطلع عليه و هوة ميت بكش بدك بتحس انه الله يعينه
و بنصح اي شخص بتجي فرصة انه يشوف انسان ميت , يفضل انه يشوفه لأنه جد بتغير مفهومك للموت وبترك فيك شي ,
و على فكرة الحزن على الميت عندي بجي من باب فقدانه انه ماعدنا انشوفه ابدا , و يلي بزعل بحكي ليه مات و تركني , بإدر احكي له انه خلص عمره و هيك الله كاتب , والله يرحمه و يغفر له ماألك غير الدعاة الو
تنبيه صغير , اياك انك تدعي بشي وانته مالك مدرك معناته او مقدر ثمن الدعوة لأنه والله مو مزحة يلي بفكر انه اوحد بألو بدعي عليك شغلة سهلة
ستي الله يرحمها كانت دائما تألي :” لك روح يا موفأ ان شاء الله بتأبرني و تكفني يا ستي “ء من باب المدح و الحب
وفعلا هاد يلي صار و ربنا استجاب لدعوتها و كفنتها و ابرتها بإيدي
Sphere: Related Content
