سوق معاملات الأحوال المدنية
Tuesday, September 4th, 2007نعم سوق الأحوال المدنية يلي مابيعرف وينو هاد الشارع يلي خلف السفارة العراقية جبل عمان الدوار الأول
ليه سوق ؟ بسيطة الكل بنادي اول ما تفوت على الشارع بتسمع , تصديق جواز سفر شهادة ميلاد , طوابع لو سمحت شوي شو معاملتك و الأحلى يلي بأشرلك من بعيد انه تجي لعندو و بس تجي لعندو بألك شو معاملتك , طبعا انسى انه تصوير الورقة ب عشرين قرش والطابع ابو الربع دينار بصير بنص بتحس حالك مهم ما بصفى كشك إلا بصرخك انه تعى لهون , و بتغزلو فيك و هي صورة حلوة متلك , شكرا , كيف بس مرتبة صح , اااه اي غير شكل حاسسها احلا من النسخة الأصل ايده تأمر, سلامت خيرك تسعين قرش , و رجع عشر قروش و مو من نفس طبعا نسحتين و طابعين ابو الربع ….و
و بتوقت على دور طويل بجي تبع
مي بادرة, عصير , شاي قهوة شــــباب , بارد سخن يا معلم , شـــــــــــــــباب مي باردة عصير طبيعي شاي سخن, دخان , شبــــــــــــــــــــاب
و بياع الكعك , كعك كعك , جبنه زعتر , ايوا معلم مع بندورة , لا الله يخليك سادة شطة ؟ اه لو سمحت , ملح ؟ لا معي ضغط , شاي بيبسي , خود والعالم ع متشتري و تاكل على الدور و تشرب و تدخن
و عجقة والناس عم تتخانق و البيع شغال , و ما بتتحرك إلا بنطلك واحد بسئل , هون التصديق؟ من وين جبت هي الورقة , طيب هون بسلمو الجوازات , لا حبيبي هون توزيع المؤن و كروت الجمعية , و الخبز الجهة التانية !!!!!!و
شو هاد والله اليوم مع انه كلن نص ساعة بس شي خيلة ,سبحان الله ارزاق , لك و هاد الأجدب ابو الصينية ما عرف يوقف فوق راسي و على صريخ
مي باردة عصير شباب , اي شو مشان معلم طرشتنا وقف بعيد, ليه يا خوي مطوبه بإسمك لخينا نعرف نترزق بدك مي؟
ويلي الله يعنيها جايبه كل ما ولدت من اطفال معها , واااع ماما عطشان , بدي افوت على الحمام , , الام اخرس ولا , اسكت , امسكي ايد اخوكي , ولك يا حيوان تعال هون وقت عند السور الله يلعن ابوك ,و
و الختيارية يلي , معلش يعني بدي اوقف كدامك عشان مريظ مش كادر , لك طيب ليـــــــــــــــــــه جاييي؟؟؟؟ الله يعين الناس اااخ
و لا الختيارة , يلي تركت كل الزلم و اجت لعندي , خالتي ممكت تكرالي هين شو بدهن!!! ااه حجه هدول وراك جوازات هون تصديق شهادات ميلاد
طيب وين اروح , هما كالولي هان , سئلتلها طلعت شغلتها على الشارع التاني , و شافت المبني بعيد وصارت تحكي مع حالها و و على ابو سعد , مين ايو سعد مابعرف بس يلي بعرفو انه اذا ادنه ما طنو بكون انطرش و يمكن ما كمل نهارو سالم
