MQabbani, Minds Talk

كيف الحال؟ و شو الأخبار؟

الي زمان ما كتبت شي, اوضاعي غير مستقرة نوعا ما , و كل ما اجي بدي كتب شي ببطل , او هي خلص ما بعود جاي على بالي

رمضان تمام التمام الحمد لله , عم بمر اليوم بسرعة و شي ظرف :( للأسف صرنا بالعشر الأخير يعني رمضان عم نودعو ,

و العالم برمضان مشغولة كل العادة بكل شي , من شو تعمل على الفطور ,وين بدها تسهر و مسلسل باب الحارة الجزء 3 4 5 6 و ابو حاتم و ام حاتم , و جميلة و معتز الأبضاي و و كل الشلة , من العقيد ابو شهاب ل المشكلجي ابو غالب

و بما اني شامي , ف ما صفي حدا إلا و سئلني ليه موتو ابو عصام ؟ شو في شو صاير؟ كانو انا الموفوض او المندوب !! يعني كل عادة بتكون شغلة مصاري …
على العموم لازم نحن ننتقد كل شي و ننكش عيوبو أول بعدين اذا صفي وقت منشوف الحسنات , كل يلي انتقدو باب الحارة مسكو موضوع المرأة و انه حقوق و ما حقوق و رجعية و تخلف , طيب شو رأيكم انه هاد مسلسل عن تاريخ قديم ؟؟ يعني انه فعلا هيك كان اكتيير اشياء خاصة للمرأة هيك كانو فعلا بشكل عام و في ناس بالشام مازالو على هالعقلية مابعرف ليه محملين المسلسل فوق طاقتو !! وانه حقوق المراة , بدي افهم ليه كل ما يطلع شي بوضح سلطة الرجل على المرأة , بصر تخلف و رجعية!!!

يعني تركو انه كانو يدعمو الثوار , وانه كان يقامو الإستعمار , وانه كانو على بعضن و يسترو على بعض و يعرفو احوال بعض و يساعدو المحتاج فيهم ,وانه كلمة الكبير ما بتصير تنتين يعني مثابة ولي الأمر , و الغريب لما بكون بالحارة لازم يكون له سبب مقنع و بصير داسوس و غير مرحب فيه , يعني مو متل هلأ صرنا بأحياء ما بتعرف شو أسم جارك او شو بشتغل, و الواحد بيموت جاره بالحارة بيعرف بعد اسبوع اذا مو شهر , و الشاطر هلأ يلي بروح ببلغ عن جاره و بشك اسفاين

بالنهاية المسلسل ما دس افكار غربية ولا افكار جديدة علينا مو أحسن من مسلسل نور و مهند يلي عمل كوارث اخلاقية بين الشباب و خلافات زوجية صعبة !! ولا هلأ الكل صار متحضر و بفهم يخزي العين و نسي انه جده كان يحمل سته مسؤولية انه المولود بنت !! وانه جدك و جدي كانو ما يخلو نسوانهم يطلعو من البيت بدون سبب قاهر وانه المرأة مكانها بيتها! و انه الأب رجال البيت و كلمتو ما بتصير تنتين ! هيك كانو عايشين , والمسلسل ما جاب شي من بيت اهلو

ما بحكي انه المسلسل كامل بس إلو ايجابيات و اله سلبيات , بس انا شايف ايجابياتو اكتر بكتير من سلبياتو

و هلأ صار عيب انك تتفرج عليه للمسلسل !!
بتبابع باب الحارة ؟
يعني
يازلمة مسخرة , انا مش عارف الناس ليه حابينو ؟
زوقهم صعب شو بدك تعمل انه بس يطلع غمض عيونك بكون احسن