Abu Mahjoob ROCK
Wednesday, July 25th, 2007
طبعا الها علاقة بالبوست يلي قبلو 100% ههه بس بدل مياه الشرب تنظيم عمان بتزبط
Archive for the ‘ِammaneh’ Category
عصابة وسط البلد
Wednesday, July 25th, 2007عصابة وسط البلد يلي بتسرق البسطات هيك اجنبي سائح مع مرته و صحابهم , عم يألي انه في عصابات عندكم؟
انا التلو عصابات شو
الأجنبي : نحنا شفناهم عم يهجمو على بائع على البسطة و ياخدو اغراضهم و يحطوهم بالسيارة و او يحطموهم برجليهم و اليوم ضربو واحد منهم و يلي استغربنا منو انهم معهم شرطة فاسدة لأنه عم تمشي معهم ؟
انا : اااه بألبي لعمى على القصة شلون بدنا نحكيها و الله فضيحة , جاوبتو انه هدول مخالفين و هدول مو عصابة هدول جماعة أمانة عمان بصادرو البسطات و الباعة المتجولة و الشرطة مو فاسدة هي مرافقة و السيارة حكومية اصلا
الأجنبي : بس كان عم يتعاملو معهم بوحشية انه يقلب البسطة على الأرض و يحطم و يدعس على الموجودات و عاملوهم بعنف
انا: والله مو شرط بكون تبع البسطة قاوم او غلط معهم , اكيد ما بتصرفو هيك دائما هي حالة نادرة جدا جدا , وبألبي عم أوول الله لا يوفقهم
الأجنبي :بس شفناهم ضربو بعض و تجمعت لناس و حتى زوجتي صورتهم فيدو
زوجة الأجنبي : طيب ليه ما يتركوهم منظرهم حلو , و عندهم اشياء حلوة و رخيصة , او ليه ما يعملولهم سوق خاص
انا : اكيد فكرو بهيك شي (بألبي , انو سوق هاد اي هنن توزيع طرق و تزبيطها ما عم يعرفو بدكم سوق !!!)و
الأجنبي : متل ما بعرف عندكم هيئة حقوق انسان ليه ما بتابعهم
انا : كلو متابع اكيد طبعا مع ابتسامة
يعني والله العظيم امانة عمان لازم يكون اسمها خيانة عمان فضحونا ادام الأجانب , مشان شوية زعران معينتهم الأمانة و كل واحد فيهم شايف حالو و مو مصدق , يا أمانة عمان الموقرة راااااااااااااااقبي موظفين و تابعيهم بلا فضايح و بهدلة انتي مو ناقصك
يعني معأول لما بدك تمنع واحد من شغلة هيك بتعمل , انا شففتهم مو مرة 100 مرة كمان بجي متل الأسد بهجم برجله على بسطة البائع يلي على الأرض او الكرتونة و بكسر و بقلبها على الأرض , يعني استفزاز لما يكون مصدر رزق الزلمة و تعمل معه هيك , والله لو مكانة مو بس بضربو و بكسرايده كمان , لعمى مخالف الزلمة , الو تفضل معي دفعو غرامة , اما انك اتهينو و تبهدلو فوق ما هو عم يعمل جهدو يكسب رزق , يعني لو شوماكان في الف طريقة لتعامل معن احسن من هيك
اسئلة ببالي:
شو صلاحية هاد الموظف التابع للأمانة ؟؟
الأغراض المصادرة و ين بتروح؟ يعني جرابات أبو 4 بدينار و احزمة جلدية , و احيانافواكة ؟ بتتلف ؟ ولاوين؟؟
لو واحد بدو يبيع على بسطة مافي قانون خاص او ترخيص معين ؟؟
شو الغرامة المتربتة عليهم ؟ و الباعة تبع الترمس و الذرة كمان ممنوع يتجول ؟؟
أستعدو للأزمة السير في عمان
Saturday, July 21st, 2007المفروض انه تم افتتاح مجمع سفريات الشمال في منطقة شارع الأردن بديلا عن مجمع العبدلي بكامل محتوايته
اكتر حلو وممتاز و الله يعطيهم العافية , بس لما قرأت هاد الحكي صفنت والت الله يستر هيئة تنظيم المواصلات و أمانة عمان !! كرمال الله شو عم تعملو !!! يعني والله بحب عمان اتكون منظمة و مرتبة و احسن شي , بس مو هيك !!
ستسلك السيارات القادمة من منطقة شمال المملكة شارع الأردن للوصول إلى المجمع بدلا من شارع الملكة رانيا العبد الله (الجامعة سابقا).
وتسلك السيارات القادمة من محافظة البلقاء ومناطق عمان الغربية شارع الشهيد بواسطة دوار المدينة الرياضية، في حين تسلك السيارات القادمة من مناطق جنوب عمان (مادبا، المطار، الوحدات) نفق ميدان جمال عبد الناصر (دوار الداخلية) مرورا بشارع الاستقلال حتى المجمع.
شو رأيكم ؟؟؟
يعني يلي بشوف دوار المدينة و دوار الداخلية بالأيام العادية بحاول يتجنب الوصول اله بعتباره نقطة سوداء لأنه ازمة من كل الجهات , يعني هنن خففو ضغط من جهة و لحشوها على الجهة التانية ولا شو ؟!!!!!!!!!!!!!!!! مابعرف بس عنجد مالي متفائل بنوب , حاسس انه رح اتصير بهدلة مرتبة , الحلو مو بس يلي بطلع مواصلات رح يتبهدل هههههه و يلي معو سيارة كمان
شوب , و عبءة , و شمس , و زحمة سير , يا عييييييييين نشاط و حيوية بكرا منشوف و المي بتكزب الغطاس , ان شاء الله يطلع توقعي غلط و يكون كل شي 100% و الناس مرتاحة و مبسوطة
طبعا المفروض لأجرة ما ارتفعت , ولا حتى مبين خط سرفيس العبدلي شلون بدو يمشي , بس للإحتياط يلي بطلع بالمواصلات من هنيك يعمل حسابه ساعة زمن ابكر على الأقل مشان يوصل على الوقت
نقطة صغيرة , الأعلان لنقل المجمع تم الإعلان عنه بالجرايد قبل يومين و مرة وحدة بالإذاعة , غريب لو حطو لوحة متل لوحات الإنتخابات بالمجمع انه رح ينتقل كان الناس عرفت , خاصة انه يلي بطلع مواصلات ما بسمع راديو اكتير و مو الكل بقرا جريدة
لهلا عم حاول افهم شلون بتخدو قرارات و بتصرفو ما مابعرف , ومشان الحلال والحرام الجماعة عملو دراسة قبل ما يحطو عي الخطة !!
