عصابة وسط البلد
عصابة وسط البلد يلي بتسرق البسطات هيك اجنبي سائح مع مرته و صحابهم , عم يألي انه في عصابات عندكم؟
انا التلو عصابات شو
الأجنبي : نحنا شفناهم عم يهجمو على بائع على البسطة و ياخدو اغراضهم و يحطوهم بالسيارة و او يحطموهم برجليهم و اليوم ضربو واحد منهم و يلي استغربنا منو انهم معهم شرطة فاسدة لأنه عم تمشي معهم ؟
انا : اااه بألبي لعمى على القصة شلون بدنا نحكيها و الله فضيحة , جاوبتو انه هدول مخالفين و هدول مو عصابة هدول جماعة أمانة عمان بصادرو البسطات و الباعة المتجولة و الشرطة مو فاسدة هي مرافقة و السيارة حكومية اصلا
الأجنبي : بس كان عم يتعاملو معهم بوحشية انه يقلب البسطة على الأرض و يحطم و يدعس على الموجودات و عاملوهم بعنف
انا: والله مو شرط بكون تبع البسطة قاوم او غلط معهم , اكيد ما بتصرفو هيك دائما هي حالة نادرة جدا جدا , وبألبي عم أوول الله لا يوفقهم
الأجنبي :بس شفناهم ضربو بعض و تجمعت لناس و حتى زوجتي صورتهم فيدو
زوجة الأجنبي : طيب ليه ما يتركوهم منظرهم حلو , و عندهم اشياء حلوة و رخيصة , او ليه ما يعملولهم سوق خاص
انا : اكيد فكرو بهيك شي (بألبي , انو سوق هاد اي هنن توزيع طرق و تزبيطها ما عم يعرفو بدكم سوق !!!)و
الأجنبي : متل ما بعرف عندكم هيئة حقوق انسان ليه ما بتابعهم
انا : كلو متابع اكيد طبعا مع ابتسامة
يعني والله العظيم امانة عمان لازم يكون اسمها خيانة عمان فضحونا ادام الأجانب , مشان شوية زعران معينتهم الأمانة و كل واحد فيهم شايف حالو و مو مصدق , يا أمانة عمان الموقرة راااااااااااااااقبي موظفين و تابعيهم بلا فضايح و بهدلة انتي مو ناقصك
يعني معأول لما بدك تمنع واحد من شغلة هيك بتعمل , انا شففتهم مو مرة 100 مرة كمان بجي متل الأسد بهجم برجله على بسطة البائع يلي على الأرض او الكرتونة و بكسر و بقلبها على الأرض , يعني استفزاز لما يكون مصدر رزق الزلمة و تعمل معه هيك , والله لو مكانة مو بس بضربو و بكسرايده كمان , لعمى مخالف الزلمة , الو تفضل معي دفعو غرامة , اما انك اتهينو و تبهدلو فوق ما هو عم يعمل جهدو يكسب رزق , يعني لو شوماكان في الف طريقة لتعامل معن احسن من هيك
اسئلة ببالي:
شو صلاحية هاد الموظف التابع للأمانة ؟؟
الأغراض المصادرة و ين بتروح؟ يعني جرابات أبو 4 بدينار و احزمة جلدية , و احيانافواكة ؟ بتتلف ؟ ولاوين؟؟
لو واحد بدو يبيع على بسطة مافي قانون خاص او ترخيص معين ؟؟
شو الغرامة المتربتة عليهم ؟ و الباعة تبع الترمس و الذرة كمان ممنوع يتجول ؟؟
July 25th, 2007 at 4:44 am
لعمى صحي شو معلاقو كبير هل الأجنبي…
يا زلمة فكرتك عم تحكي على بلدية حلب, تعا شوف عنا, حرب غير معلنة, سابق القط والفار,
المشكلة إنو عنا بحلب متطورين أكتر بكتير من عمان, طبعاً على أصحاب البسطات, لأنو لم يعد صاحب البسطة انسان درويش إنما أصبحت البسطو واجهة لأعمال أخرى وأنا بايد البلدية, لأنو لو تشوف مناظر بياعين البسطات, مو بس هيك, أغلبهم مشكلجية, وبيبسطو قدام المحل بالسوق, وهيك بيسكر على الزباين, وبيلطش النسوان, وبيبيع حشيش, وحتى من قعدتهم الطويلة قدام محل معين, بيراقبوا وبيعرفوا ايمتى بيفتح وايمتى بيسكر لحتى يسرقوا..
بتذكر لحد الآن لما كنت بالسوق واجت كبسة من الشرطة, ولما كانت الشرطة عم تشيل البسطات, هجمو بياعين البسطات على الشرطة وضربوهم, وطالعوا السكاكين, وما قدرت الشرطة تطلب الدعم فهروبوا وشي خمس دقائق رجعت أفواج أفواج من الشرطة, وشرطة حفظ النظام, ومسكوهم كلهم بالقوة…
هذا عنا بحلب, ما بعرف إذا نفس الشي بالأردن
بس هذا الأجنبي شي نهفة, ومرتو شي وحدة مو قليلة…حاملة الكاميرا ونازلة تصوير… :mrgreen:
July 25th, 2007 at 8:35 am
لوووووووول، والله هالأجنبي ومرتو عنجد نهفات
July 25th, 2007 at 9:06 am
اول شي، الله يلعن الاجانب، انا صرلي فترة عم شوف شوفات منهم شي مو معقول، وبعدين على اساس انو ما عندن هيك ببلدهم؟؟ بكل بلد في هيك، ومو ضروري الشرطة تكون فاسدة.. هلأ هاد ما بيعني اني عم أيّد الامانة على هالشي اللي عم تعملو، يعني بياع البسطة لو معو، كان قعد طول النهار على هالبسطة بالشوب وبالبرد؟ ازا بدهم يخالفوا، المفروض يكون في حل بديل بالاول، وبعدين بيخالفوا.. وطبعا يا حسرة، لمين بدك تحكي هالحكي؟ الكل عامل غسيل دماغ على اساس لمصلحة الوطن.. اي الله يعينك يا وطن
July 25th, 2007 at 11:01 am
loool ! esh hal fadaye7 hay! :roll:
July 25th, 2007 at 1:01 pm
والله ياموفق
أسئلتك على الوجع وبنفس الوقت بتلسع إلي عنده دم
بتذكرني يقولة يطير كالفراشة ويلسع كالنحلة
:mrgreen:
السؤال الأهم ليش نلحظ أحيانا أنهم الجماعة عندهم خيار وفقوس؟ سؤال أظن لازم ينضاف على أسئلتك؟
July 25th, 2007 at 3:23 pm
ع سيرة البضاعة المصادرة وين بتروح, بتروح ع الإستهلاك طبعاً! يكبّوها هيك يعني! برضو موظفين الأمانة عندهم عائلات يصرفوا عليها, ومافي شي ما بلزم..
حتى لأمرات لمّا يكونوا مقطوعين من الدخان بروحوا بعملوا كبسة تفتيش ع بسطة دخان مهرّب وبصادروله الدخانات لإنها مو مجمركة… وبحشّوها بمعرفتهم
:p
July 25th, 2007 at 4:41 pm
Good post.
July 25th, 2007 at 10:15 pm
:s
December 12th, 2007 at 12:28 pm
مش عارف شو بدي احككككككككككككييييييي
مشكوررررررررر يا كبيرررررررررررر